தென் கொரியாவில் தேர்வுக் குளறுபடி தொடர்பான முறைகேடு விவகாரம் அந்நாட்டையே அதிர்ச்சிக்குள்ளாக்கிய நிலையில், அந்நாட்டின் கல்வி அமைச்சர் சோய் கியோ-ஜின் தனது பதவியை ராஜினாமா செய்துள்ளார். வியாழக்கிழமை நடைபெற்ற சுனுங் (Suneung) எனப்படும் வருடாந்திரக் கல்லூரி நுழைவுத் தேர்வின் போது, ​​செயற்கை நுண்ணறிவு (AI) உதவியுடன் மேற்கொள்ளப்படும் முறைகேடுகளைத் தடுப்பதற்காகக் கடைசி நேரத்தில் எடுக்கப்பட்ட நடவடிக்கைகளால் ஏற்பட்ட குழப்பத்திற்குத் தான் முழுப் பொறுப்பேற்பதாக அவர் தெரிவித்துள்ளார்.    
ஒரு வாரத்திற்கு முன்பு, தேசிய வரி கணக்கியல் தேர்வில் அதிக மதிப்பெண் பெற்றவர், மினி-கமெரா, அலைபேசி மற்றும் செயற்கை நுண்ணறிவு (AI) கருவிகளைப் பயன்படுத்தியதை ஒப்புக்கொண்டார்.இதன் விளைவாக, மறைத்து வைக்கப்பட்ட சாதனங்களைக் கண்டறிய அதிகாரிகள் அவசரகால நடவடிக்கைகளை மேற்கொண்டனர்; இதில் நாட்டின் ஒவ்வொரு அலைபேசிக்கும் அவசர எச்சரிக்கைகளை அனுப்பியதும் அடங்கும்.சுனுங் (Suneung) தேர்வை எழுதி முடிக்க ஒன்பது மணிநேரம் வரை ஆகலாம்; இது லட்சக்கணக்கான தென் கொரியர்களின் தொழில்முறைப் பாதையைத் தீர்மானிப்பதில் முக்கியப் பங்கு வகிக்கிறது.இந்த நிலையில், பொறுப்பு வகிக்கும் அமைச்சர் என்ற முறையில், நாங்கள் முன்கூட்டியே தயாராகத் தவறிவிட்டோம் என்ற விமர்சனத்திலிருந்து என்னால் தப்பிக்க முடியாது என்று கருதுகிறேன் என்று சோய் கூறியதாக, தென் கொரியாவின் யோன்ஹாப் செய்தி நிறுவனம் ஞாயிற்றுக்கிழமை தெரிவித்தது.தேர்வு முடிந்துவிட்ட நிலையில், தனக்கு ஒரு பெரும் பொறுப்புணர்வு ஏற்பட்டுள்ளது என்றும், எனவே பதவியை ராஜினாமா செய்வதாகவும் அந்த அமைச்சர் கூறியுள்ளார். தென் கொரிய ஜனாதிபதி லீ ஜே மியுங் - தற்போதைய தேர்வு முறையை மாற்றியமைக்க அழைப்பு விடுத்துள்ளதுடன், அமைச்சர் சோயின் ராஜினாமாவையும் ஏற்றுக்கொண்டார்.சுமார் 5 லட்சம் மாணவர்கள் பங்கேற்ற இந்த ஆண்டின் சுனுங் தேர்வின் போது, ​​111 மாணவர்களிடம் அங்கீகரிக்கப்படாத மின்னணு சாதனங்கள் கண்டறியப்பட்டதாக கல்வி அமைச்சகம் முன்னதாகத் தெரிவித்திருந்தது.மிகவும் கடுமையான போட்டி நிலவும் இந்தத் தேர்வில், செயற்கை நுண்ணறிவு (AI) சாதனங்களைப் பயன்படுத்தி மாணவர்கள் முறைகேடுகளில் ஈடுபட்டதாகத் தகவல்கள் வெளியானதைத் தொடர்ந்து, கல்விசார் நேர்மையின்மை குறித்த கவலைகள் கடந்த சில வாரங்களாகவே எழுந்து வந்தன.கடந்த வார இறுதியில் இந்த அச்சங்கள் உச்சத்தை அடைந்தன; ஏப்ரல் மாதம் நடைபெற்ற வரி கணக்கியல் தேர்வில் முதலிடம் பெற்ற ஹான் வோன்-சியோக், தான் முறைகேட்டில் ஈடுபட்டதை ஒப்புக்கொண்டார்.160 கேள்விகளில் ஒன்று மட்டுமே தவறாக இருந்த நிலையில், அவர் பெற்ற அசாதாரணமான அதிக மதிப்பெண் குறித்து ஊகங்கள் நிலவி வந்த சூழலில், அவர் தனது தவறை ஒப்புக்கொண்டார்.இது, சுனுங் தேர்வுக்குச் சில நாட்களே எஞ்சியிருந்த நிலையில், அவசர நடவடிக்கைகளை அறிமுகப்படுத்த அதிகாரிகளைத் தூண்டியது.தேர்வு முறைகேடுகளில் ஈடுபட்டவர்களைப் பிடிப்பதற்காக, தென் கொரியா தனது தேசிய பேரிடர் எச்சரிக்கை அமைப்பைப் பயன்படுத்தியது இதுவே முதல் முறையாகும்.