பாலஸ்தீனியர்களுக்கு இஸ்ரேல் விடுத்த எச்சரிக்கை!

உதவி விநியோக மையங்களுக்குச் செல்லும் பகுதிகளுக்கு பயணம் செய்ய வேண்டாம் என்று காசாவில் வசிப்பவர்களை இஸ்ரேலிய இராணுவம் எச்சரித்துள்ளது.

அமெரிக்க ஆதரவு அறக்கட்டளையால் அமைக்கப்பட்ட இடங்களில் உணவுக்காகக் காத்திருந்த குறைந்தது 27 பாலஸ்தீனியர்கள் இஸ்ரேலிய துப்பாக்கிச் சூட்டில் கொல்லப்பட்டதைத் தொடர்ந்து இந்த அறிவிப்பு வந்துள்ளது.

காசா மனிதாபிமான அறக்கட்டளை (GHF) அமைத்த விநியோக மையங்களுக்குச் செல்லும் வீதிகள் “போர் மண்டலங்கள்” என்று கருதப்படுவதாக இஸ்ரேலிய இராணுவ செய்தித் தொடர்பாளர் செவ்வாயன்று (03) தெரிவித்தார்.

இந்த நிலையில் சமூக ஊடகங்களில் ஒரு பதிவில் GHF, அதன் விநியோக மையங்கள் “புதுப்பிப்பு, அமைப்பு மற்றும் செயல்திறன் மேம்பாட்டுப் பணிகளுக்காக” மூடப்படும் என்று புதன்கிழமை (04) அறிவித்தது.

குழு செய்ய விரும்பும் மேம்பாடுகள் குறித்து கூடுதல் தகவல்களை வழங்கவில்லை.

அதேநேரம், செயல்பாடுகள் வியாழக்கிழமை மீண்டும் தொடங்கும் என்று குழு கூறியது.

செவ்வாய்க்கிழமை அதிகாலை GHF இன் உணவு விநியோக மையங்களில் ஒன்றில் உணவு பெறுவதற்காக கூடியிருந்த 27 பேர் கொல்லப்பட்டதாக காசாவின் சுகாதார அமைச்சகம் தெரிவித்துள்ளது.

மூன்று நாட்களில் இதுபோன்ற மூன்றாவது சம்பவம் இதுவாகும்.

செவ்வாயன்று இஸ்ரேல் முதல் முறையாக தங்கள் படைகள் தங்களை நோக்கி நகரும் பாலஸ்தீனியர்களை நோக்கி சுட்டதாக ஒப்புக்கொண்டது.