காசாவிற்கு Board of Peace உறுப்பினர்கள் 5 பில்லியன் டொலர் நிதியுதவி.

காசா மறுசீரமைப்பிற்கு ட்ரம்ப்பின் Board of Peace உறுப்பினர்கள் 5 பில்லியன் டொலர் நிதி வழங்கவுள்ளனர். அமெரிக்க ஜனாதிபதி டொனால்டு ட்ரம்ப், தனது புதிய “Board of Peace” அமைப்பின் உறுப்பினர்கள் காசா பகுதியை மறுசீரமைப்பதற்காக 5 பில்லியன் அமெரிக்க டொலர் நிதி வழங்க உறுதியளித்துள்ளதாக அறிவித்துள்ளார். “இந்த அமைப்பு வரலாற்றிலேயே மிக முக்கியமான சர்வதேச அமைப்பாக இருக்கும். இதன் தலைவராக இருப்பது எனக்கு பெருமை” என்று ட்ரம்ப் சமூக வலைத்தளத்தில் பதிவிட்டுள்ளார்.

இந்த நிதி உறுதிமொழிகள், வாஷிங்டனில் வியாழக்கிழமை நடைபெறும் முதல் கூட்டத்தில் அதிகாரப்பூர்வமாக அறிவிக்கப்படவுள்ளன.

அவர் எந்த நாடுகள் இந்த நிதியை வழங்குகின்றன என்பதைத் தெளிவுபடுத்தவில்லை. ஆனால், இந்தோனேஷியா தனது 8,000 படையினரை ஜூன் மாதத்திற்குள் காசா பகுதியில் மனிதாபிமான மற்றும் அமைதி பணிகளுக்காக அனுப்பத் தயாராக இருப்பதாக அறிவித்துள்ளது. இது, ட்ரம்ப் பெற்ற முதல் உறுதியான பங்களிப்பாகும்.

ஐ.நா., உலக வங்கி மற்றும் ஐரோப்பிய ஒன்றியத்தின் மதிப்பீட்டின்படி, காசா பகுதியை மறுசீரமைப்பதற்கு சுமார் 70 பில்லியன் டொலர் தேவைப்படும்.

கடந்த இரண்டு ஆண்டுகளாக இஸ்ரேல் நடத்திய கடுமையான தாக்குதலால் காசா பகுதியில் பெரும்பாலான இடங்கள் சேதமடைந்துள்ளன.

அமெரிக்கா நடத்திய சமீபத்திய சமாதான ஒப்பந்தத்தின் படி, காசாவில் ஆயுதம் ஏந்திய சர்வதேச பாதுகாப்புப் படை அமைக்கப்பட வேண்டும். ஹமாஸ் அமைப்பை ஆயுதமின்றி ஆக்குவது இஸ்ரேலின் முக்கிய கோரிக்கையாகும். ஆனால் இதுவரை பல நாடுகள் இந்த படையில் பங்கேற்க ஆர்வம் காட்டவில்லை.

ட்ரம்ப், இந்த புதிய அமைப்பை உலகளாவிய பிரச்சினைகளைத் தீர்க்கும் நோக்கத்துடன் உருவாக்கியுள்ளார். இது, ஐ.நா. பாதுகாப்பு கவுன்சிலுக்கு மாற்றாக அமெரிக்கா முன்னெடுக்கும் புதிய முயற்சியாகக் கருதப்படுகிறது.