தியாக தீபம் திலீபன் சிலையை மீள அமைக்க கோரி ஜனாதிபதிக்கு கடிதம்!

நல்லூரில் அமைக்கப்பட்டிருந்த தியாக தீபம் திலீபனின் நினைவுச் சிலையை பொலிஸார் அகற்றியமை தொடர்பில் உடனடி விசாரணை நடத்தி, சட்டரீதியான முறையில் நினைவுச் சிலையை மீள அமைக்க நடவடிக்கை எடுக்குமாறு கோரி, ஜனாதிபதிஅனுர குமார திசாநாயக்கவுக்கு புதிய தொழிலாளர் முன்னணியின் பொதுச்செயலாளர் முரளி ரகுநாதன் கடிதம் ஒன்றை அனுப்பி வைத்துள்ளார்.

அதிமேதகு ஜனாதிபதி அவர்களுக்கு,

வணக்கம்.

யாழ்ப்பாணம் நல்லூரில் தியாக தீபம் திலீபனின் நினைவாக அமைக்கப்பட்டிருந்த நினைவுச் சிலை, 39ஆவது ஆண்டு நினைவேந்தல் நிகழ்வுகள் நிறைவடைந்த மறுநாளான இன்று பொலிஸாரால் அகற்றப்பட்டுள்ளதாக வெளியாகியுள்ள செய்திகள் தமிழ் மக்கள் மத்தியில் மிகுந்த கவலையையும் அதிர்ச்சியையும் ஏற்படுத்தியுள்ளன.

ஒரு ஜனநாயக நாட்டில் எந்தவொரு நினைவேந்தல் நடவடிக்கையும் சட்டத்திற்கு உட்பட்டதாகவும், அமைதியான முறையிலும் நடைபெற வேண்டும் என்பதில் எங்களுக்கு மாற்றுக் கருத்து இல்லை. அதேவேளை, ஒரு சமூகத்தின் வரலாற்று நினைவுகளுடன் தொடர்புடைய நினைவுச் சின்னத்தை அகற்றும் நடவடிக்கை மேற்கொள்ளப்படும் போது, அது சட்டரீதியான நடைமுறைகளையும்,

சம்பந்தப்பட்ட மக்களின் உணர்வுகளையும் மதிக்கும் வகையில் மேற்கொள்ளப்பட வேண்டும்.

குறிப்பாக, பொலிஸார் பெருமளவில் சென்று சிலையை அகற்றியதாக செய்திகள் வெளியாகியுள்ள நிலையில், இந்த நடவடிக்கைக்கான சட்ட அடிப்படை, வழங்கப்பட்ட உத்தரவு மற்றும் நடைமுறை குறித்து வெளிப்படையான விளக்கம் மக்களுக்கு வழங்கப்பட வேண்டும்.

எனவே, தங்களது அரசாங்கத்தின் நல்லிணக்கம், சமத்துவம் மற்றும் சட்டத்தின் ஆட்சி தொடர்பான கொள்கைகளை கருத்திற்கொண்டு, பின்வரும் நடவடிக்கைகளை உடனடியாக மேற்கொள்ளுமாறு அன்புடன் கேட்டுக்கொள்கிறேன்:

திலீபன் நினைவுச் சிலை அகற்றப்பட்ட சம்பவம் தொடர்பில் சுயாதீனமான மற்றும் வெளிப்படையான விசாரணை ஒன்றை நடத்த வேண்டும்.

சிலையை அகற்றுவதற்கு பயன்படுத்தப்பட்ட சட்ட ஏற்பாடுகள் மற்றும் அதிகாரபூர்வ உத்தரவு தொடர்பான முழுமையான விளக்கத்தை பொதுமக்களுக்கு வழங்க வேண்டும்.

நீதிமன்றம் அல்லது நடைமுறையில் உள்ள சட்டம் எந்தத் தடையும் விதிக்காத பட்சத்தில், அதே இடத்தில் அல்லது உரிய சட்ட நடைமுறைகளுக்கு உட்பட்டு தியாக தீபம் திலீபனின் நினைவுச் சிலையை மீள அமைக்க நடவடிக்கை எடுக்க வேண்டும்.

எதிர்காலத்தில் எந்தவொரு தமிழ் சமூகத்தின் நினைவேந்தல் நிகழ்வுகளும் தேவையற்ற பதற்றம் அல்லது இன உணர்வுகளைத் தூண்டும் வகையில் காவல்துறை நடவடிக்கைகளுக்கு உட்படுத்தப்படாமல்,

சட்டத்திற்கும் மனித உரிமைகளுக்கும் அமைவாக நடத்தப்படுவதை உறுதி செய்ய வேண்டும்.

வடக்கு மற்றும் கிழக்கு பகுதிகளில் தமிழ் மக்களின் வரலாற்று நினைவுகள் தொடர்பான விடயங்களில், சம்பந்தப்பட்ட சமூகத்தினருடன் கலந்துரையாடி அமைதியான மற்றும் சட்டரீதியான தீர்வுகளை ஏற்படுத்த வேண்டும்.

திலீபனின் அரசியல் நிலைப்பாடுகள் குறித்து பல்வேறு கருத்துக்கள் இருக்கலாம். ஆனால் அவரது நினைவைப் போற்றும் மக்களின் உணர்வுகளை முற்றாக புறக்கணிப்பது நல்லிணக்கத்தை உருவாக்குவதற்கு உதவாது.

கருத்து வேறுபாடுகள் இருந்தாலும், அவை ஜனநாயக உரையாடல், சட்டம் மற்றும் அமைதியான முறைகளின் ஊடாகவே கையாளப்பட வேண்டும்.

இலங்கை அனைத்து இன மக்களுக்கும் சம உரிமையும் சம மரியாதையும் வழங்கப்படும் நாடாக முன்னேற வேண்டும் என்பதே எமது எதிர்பார்ப்பு.

எனவே, இந்த விடயத்தில் தாங்கள் நேரடியாக தலையிட்டு, நிலைமையை அமைதியான முறையில் தீர்த்து, சட்டரீதியாக இயன்றால் தியாக தீபம் திலீபனின் நினைவுச் சிலையை மீள அமைப்பதற்கான நடவடிக்கைகளை மேற்கொள்ளுமாறு மிகவும் மரியாதையுடன் கேட்டுக்கொள்கிறேன்.

நன்றி.

மரியாதையுடன்,

முரளி ரகுநாதன்.

பொதுச் செயலாளர்

New Workers Front

முன்னாள் மத்திய மாகாண சபை உறுப்பினர்

நுவரெலியா மாவட்டம்