ஐரோப்பிய நாடொன்றில் பதுங்கியிருக்கும் Wanted குற்றவாளிகள்!

ஐரோப்பிய நாடொன்றில் பிரித்தானியாவின் மிகவும் தேடப்படும் 12 குற்றவாளிகள் பதுங்கியுள்ளனர். பிரித்தானியாவின் தேசிய குற்றப்புலனாய்வு அமைப்பு (NCA) ஸ்பெயினில் ஒளிந்திருப்பதாக நம்பப்படும் 12 மிகவும் தேடப்படும் குற்றவாளிகளின் பட்டியலை வெளியிட்டுள்ளது. இவர்கள் மீது கொலை, போதைப்பொருள் கடத்தல், மோசடி மற்றும் பணமோசடி குற்றச்சாட்டுகள் உள்ளன. இந்த நடவடிக்கை, 20 ஆண்டுகளாக நடைபெற்று வரும் "ஆப்பரேஷன் காப்டுரா" (Operation Captura) திட்டத்தின் ஒரு பகுதியாகும்.

இதுவரை 111 குற்றவாளிகளில் 98 பேர் பிடிபட்டுள்ளனர். கடந்த ஆண்டு மட்டும் 56 பேர் ஸ்பெயினிலிருந்து பிரித்தானியாவிற்கு ஒப்படைக்கப்பட்டுள்ளனர்.

NCA அதிகாரிகள் தெரிவித்ததாவது, ஸ்பெயின் பிரிட்டிஷ் குற்றவாளிகளுக்கு பொதுவான ஒளிவு இடமாக உள்ளது. காரணம், அங்கு பெரிய அளவில் பிரிட்டிஷ் வெளிநாட்டு குடியிருப்புகள் உள்ளன மற்றும் பயண வசதிகள் எளிதாக உள்ளன.

குற்றவாளிகள் பெரும்பாலும் மார்பெல்லா, மலாகா, அலிகான்டே, டெனெரிஃப் போன்ற இடங்களில் பிரித்தானிய சமூகங்களில் கலந்து கொண்டு தங்களை மறைத்துக்கொள்கிறார்கள்.

மிகவும் தேடப்படும் பட்டியலில் டெரெக் மெக்ரா பெர்குசன் (2007-ல் நடந்த கொலை வழக்கு), கேவின் பார்ல் (2004 மற்றும் 2005-ல் நடந்த இரு கொலை வழக்குகள்), சைமன் டட்டன் (பெரிய அளவிலான கோகெயின் கடத்தல் மற்றும் பணமோசடி), ஸ்பென்சர் லாம் (போதைப்பொருள் விநியோகம்), சார்லி சாலிஸ்பரி (கோகெயின் விநியோகம் மற்றும் பணமோசடி) ஆகியோர் அடங்குவர்.

மேலும், பிலிப் பாரி ஃபோஸ்டர் (மோசடி மற்றும் பணமோசடி வழக்கு), டீன் எய்டீன் (பொய்யான VAT கோரிக்கைகள்), ரஷ்ய நாட்டு குடிமகன் அலெக்சாண்டர் குக்சோவ் (பல கோடி பவுண்ட் பணமோசடி வழக்கு) ஆகியோரும் பட்டியலில் உள்ளனர்.

இந்தக் குற்றவாளிகள் குறித்து பொதுமக்களை எச்சரித்துள்ள அதிகாரிகள், குற்றவாளிகளை நேரடியாக அணுகாமல், தகவல்களை "Crimestoppers" அமைப்பிற்கு அனாமதேயமாக தெரிவிக்குமாறு கேட்டுக்கொண்டுள்ளனர்.