தேசபந்துவுக்கு எப்படி ஆசனம் கொடுத்தீர்கள்?

முன்னாள் பொலிஸ்மா அதிபர் தேசபந்து தென்னக்கோனிற்கு பிணை வழங்குவதற்கு கடுமையாக எதிர்ப்பு தெரிவித்த சட்டமாஅதிபர் திணைக்களம் அவரை கைதுசெய்வதற்கான பிடியாணை பிறப்பிக்கப்பட்டிருந்த போதிலும் தென்னக்கோன் சட்ட அமுலாக்கல் அதிகாரிகளிடமிருந்து மறைந்திருந்தார் என தெரிவித்துள்ளது.

பகிரங்க பிடியாணை பிறப்பிக்கப்பட்டுள்ள சந்தேகநபர்,மாத்தறை நீதிமன்றத்திற்கு கோர்ட்சூட் அணிந்து ஆடம்பர பென்ஸ் காரில் வந்தார் என எனக்கு தகவல் கிடைத்தது,அவர் நீதிமன்ற வளாகத்திற்குள் அமர்ந்திருந்தார்,இந்த தகவல் கிடைத்த பின்னரே நான் நீதிமன்றத்தில் ஆஜராக தீர்மானித்தேன்,சந்தேகநபர் தான் ஒரு இரகசிய பூனை போல நீதிமன்றத்திற்குள் நுழைந்து,எங்களிற்கு தெரியப்படுத்தாமல் பிணையை பெறலாம் என நினைத்திருந்தார் என சட்டமா அதிபர் திணைக்களத்தின் சார்பில் நீதிமன்றத்தில் ஆஜராகிய மேலதிக சொலிசிட்டர் ஜெனரல் திலீபா பீரிஸ் தெரிவித்தார்.

நான் நீதிமன்றத்திற்கு வந்தவேளை அவர் ஆசனத்தில் அமர்ந்திருந்தார், கனம் கோர்ட்டார் அவர்களே எப்படி அவருக்கு ஆசனம் வழங்கப்பட்டது அவர் சிறைக்கூண்டில் அடைக்கப்பட்டிருக்கவேண்டும் என திலீபா பீரிஸ் தெரிவித்தார்.

இவர் ஒரு குற்றவாளி ஒரு குற்றவாளி அகம்பாவத்துடன் நீதிமன்றத்திற்குள் நுழைய கூடாது,அவர் நிலத்தில் தவழ வேண்டும்,இவர் 20 நாட்கள் தனது தொலைபேசியை செயல் இழக்கச்செய்துவிட்டு,20 நாட்கள் தலைமறைவாகியிருந்தார்,இவருக்கும் மார்கந்துரே மதுஸ் போன்ற திட்டமிட்ட குற்றச்செயல்களில் ஈடுபடுபவர்களிற்கும் வித்தியாசமில்லை என அவர் தெரிவித்தார்.

.இந்த சந்தேகநபர் பொலிஸ்மா அதிபராக பதவி வகித்த காலத்தில் சட்டத்தரணிகள் குற்றவாளிகளை பாதுகாக்கின்றனர் என தெரிவித்தவர்,ஆனால் இன்று அவரே சட்டத்தரணிகள் புடைசூழ நீதிமன்றம் வந்துள்ளார்,இது டபில்யூ 15 ஹோட்டல் தொடர்புபட்ட விடயம் மாத்திரமல்ல,இது கர்மாவின் நீதி.

இவருக்கு கர்மா குறித்து விளங்கப்படுத்த தேவையில்லை அவரே அதனை அனுபவிக்கின்றார்.