இந்த சவாலான காலங்களில், பொருளாதார நெருக்கடியைச் சமாளிப்பதற்கு உறுதியாக இருக்கிறோம்.
புதிய அதிபர் ரணில் விக்ரமசிங்கவுடன் இணைந்து பணியாற்ற எதிர்பார்த்துள்ளதாக இலங்கைக்கான அமெரிக்க தூதுவர் ஜூலி சங் தெரிவித்துள்ளார்.
தனது உத்தியோகப்பூர்வ டுவிட்டர் தளத்தில் பதிவொன்றை வெளியிட்டு அவர் இந்த விடயத்தினைக் குறிப்பிட்டுள்ளார்.
சிறிலங்காவின் எட்டாவது நிறைவேற்று அதிகாரம் கொண்ட அதிபராக ரணில் விக்ரமசிங்க நேற்றைய தினம் நாடாளுமன்ற வாக்கெடுப்பின் மூலம் தேர்வு செய்யப்பட்டார்.
இந்தநிலையில், இன்றைய தினம் அவர் அதிபராக பதவிப் பிரமாணம் செய்து கொண்டுள்ள நிலையில், அமெரிக்க தூதுவர் தமது நிலைப்பாட்டை தெரியப்படுத்தியிருக்கிறார்.
இலங்கையானது சவாலான கால கட்டத்தில் பயணித்துக் கொண்டிருக்கிறது. இந்த சவாலான காலங்களில், பொருளாதார நெருக்கடியைச் சமாளிப்பதற்கும் நாங்கள் உறுதியாக இருக்கிறோம்.
இந்த நேரத்தில் ஜனநாயகம் மற்றும் பொறுப்புக்கூறலை நிலைநாட்டுவதற்கும், நாட்டினதும் இலங்கை மக்களினதும் பாதுகாப்பையும் எதிர்காலத்தையும் கட்டியமைப்பதற்கும் இலங்கையிலுள்ள அனைத்து தரப்பினருடனும் இணைந்து பணியாற்றுவதற்கு தயாராக இருக்கிறோம் என்று குறிப்பிட்டுள்ளார்.
