சங்குக்கு வாக்களித்து எமது சங்கையை காப்பாற்றுவோம்!

தமிழர்களாகிய நாம் அனைவரும் சங்குக்கு வாக்களித்து எமது சங்கையை காப்பாற்றுவோம் என்று இலங்கை தமிழரசுக் கட்சியின் காரைதீவு பிரதேச தலைவரும், முன்னாள் தவிசாளருமான கலாநிதி கிருஸ்ணபிள்ளை ஜெயசிறில் தெரிவித்தார்.

திருக்கோவில் மண்டானைப் பிரதேசத்தில் இடம் பெற்ற பொது வேட்பாளருக்கான பிரச்சாரக் கூட்டத்தில் உரையாற்றிய போது மேற்கண்டவாறு தெரிவித்தார்.

தமிழ் பொது வேட்பாளர் பாக்கிய செல்வம் அரியநேத்திரனுக்கு ஆதரவளிக்கும் இந்நிகழ்வு மண்டானை பிரதேசத்தில் ஞாயிற்றுக்கிழமை நடைபெற்றது.

கடந்த எட்டு ஜனாதிபதிக்கு வாக்கு போட்டு தமிழர்கள் கண்ட பலன் என்ன?ஆறு முறை பிரதம மந்திரியாக இருந்த ரணில் இதுவரைக்கும் தமிழருக்கென்று ஆற்றிய பணி என்ன? திருக்கோவில் பிரதேசத்தை முன்னேற்றுவோம் என்று கூறி பலர் வந்தார்கள் என்றார்.

ரணில் அழைத்தார் சென்றேன் என்று கூறி தந்தையைக் கொன்றவனுடன் கைகோர்த்து நிற்கும் அவலக் காட்சிகளை காண்கிறோம். கோடிக்காக ரணில் சஜித் பின்னால் செல்லும் கூட்டத்தை இன்னும் தமிழர்கள் நம்பலாமா? என்றும் கேள்வி எழுப்பினார்.

இங்கு வெள்ளம் கொரோனா வந்தால் நாங்கள் வருவோம். ஆனால் இன்று வெள்ளை சிவப்பு வாகனங்களில் வருபவர்கள் எப்பொழுதாவது இங்கு வந்தார்களா? தேர்தலுக்குப் பிறகு இவர்களை உங்களால் காண முடியுமா? இல்லை . ஆனால் அவர்கள் தருவதை வாங்கிக் கொள்ளுங்கள். உங்களது வாக்குகளை சங்குக்கு இடுங்கள். சங்கே முழங்கு. சங்கையை காப்பாற்றுவோம் என்றார்.