இஸ்ரேலுக்கு அமெரிக்க ஆயுத விற்பனையைத் தடுக்கும் தீர்மானம்!

இஸ்ரேலுக்கு வெடிகுண்டுகள் மற்றும் புல்டோசர்களை விற்பனை செய்வதைத் தடுக்க, பெர்னி சாண்டர்ஸ் புதன்கிழமையன்று நாடாளுமன்றத்தில் ஒரு தீர்மானம் முன்னெடுப்பார் என்ற தகவல் வெளியாகியுள்ளது. இது, அமெரிக்காவின் நீண்டகால நேச நாடான இஸ்ரேலுக்கு அமெரிக்காவின் ஜனநாயகக் கட்சியினரிடையே உள்ள ஆதரவைச் சோதிக்கும் ஒரு அளவுகோலாகவும் அமையும். ஜனநாயகக் கட்சியின் செனட்டர்களுடன் இணைந்து செயல்படும் சுயேச்சையான பெர்னி சாண்டர்ஸ், இஸ்ரேலுக்கு எதிரான ஒரு முதன்மையான தீர்மானத்தின் மீதான வாக்கெடுப்பைக் கூட்டத் திட்டமிட்டுள்ளார்.

இஸ்ரேலிய இராணுவத்திற்கு 151.8 மில்லியன் டொலர் மதிப்பிலான 12,000 எண்ணிக்கையில் 1,000 பவுண்டு குண்டுகள் விற்பனை செய்யப்படுவதை தடுக்கவும், அத்துடன் 295 மில்லியன் டொலர் மதிப்பிலான புல்டோசர்கள் விற்பனை செய்யப்படுவதைத் தடுக்கும் இரண்டாவது தீர்மானமும் நிறைவேற்ற திட்டமிட்டு வருகிறார்.

செனட் சபையில் இஸ்ரேலுக்கான இராணுவ உதவியை நிறுத்தும் தீர்மானங்களை பரிசீலனைக்கு கொண்டுவர சாண்டர்ஸ் முயற்சிகள் முன்னெடுப்பது இது நான்காவது முறையாகும்.

ஆனால், அவை அனைத்தும் சபையின் குடியரசுக் கட்சிப் பெரும்பான்மையினராலும், பல ஜனநாயகக் கட்சியினராலும் நிராகரிக்கப்பட்டுள்ளன. இருப்பினும், புதன்கிழமை நடைபெறும் இந்த வாக்கெடுப்பு, சபையின் ஜனநாயகக் கட்சியினரிடையே இஸ்ரேல் மீதான மனநிலையின் ஒரு குறிகாட்டியாக அமையக்கூடும்.

ஏனெனில், காஸா மற்றும் தெற்கு லெபனான் மீதான தாக்குதல்களில் பெஞ்சமின் நெதன்யாகுவின் நடத்தை குறித்தும், ஈரானுடனான மோதலில் டொனால்ட் ட்ரம்புடன் அவர் ஒத்துழைத்தது குறித்தும் தங்கள் வாக்காளர்களிடையே அதிருப்தி நிலவும் மனநிலையை அவர்கள் எதிர்கொண்டு வருகின்றனர்.

கடந்த மூன்று ஆண்டுகளாக நெதன்யாகு அரசாங்கத்தின் கொடூரமான மற்றும் சட்டவிரோதமான நடத்தைகளைக் கருத்தில் கொண்டு, அமெரிக்க மக்கள் போதும் என்று முடிவெடுத்துவிட்டனர். இந்த நாட்டில் இஸ்ரேலுக்கான ஆதரவு பெருமளவில் சரிந்துள்ளது என்று சாண்டர்ஸ் கூறியுள்ளார்.

இந்த மாதம் வெளியிடப்பட்ட ஒரு கருத்துக்கணிப்பில், 80% ஜனநாயகக் கட்சியினரும் 41% குடியரசுக் கட்சியினரும் இஸ்ரேலை எதிர்மறையாகப் பார்ப்பதாகத் தெரியவந்துள்ளது.

இந்த நிலையில், இஸ்ரேலுக்கான ஆயுத விற்பனையைக் கட்டுப்படுத்தும் வகையில் சாண்டர்ஸ் அறிமுகப்படுத்திய தீர்மானங்களுக்கான ஆதரவு, ஜனநாயகக் கட்சியின் செனட்டர்களிடையே அதிகரித்து வருவதாகத் தெரிகிறது.

மேலும், பிரதிநிதிகள் சபையில், அயர்ன் டோம் ஏவுகணைத் தடுப்பு அமைப்பு போன்ற தற்காப்பு ஆயுதங்களுக்கான உதவியையும் சேர்த்து, இஸ்ரேலுக்கான அனைத்து இராணுவ உதவிகளையும் நிறுத்த வேண்டும் என்ற எண்ணம் சில முற்போக்கு நாடாளுமன்ற உறுப்பினர்களிடையே வலுப்பெற்றுள்ளது.

இதற்கிடையில், ஈரானுக்கு எதிரான போரை ட்ரம்ப் தொடர்வதைத் தடுக்கும் போர் அதிகாரங்கள் தொடர்பான தீர்மானத்தின் மீது செனட் ஜனநாயகக் கட்சியினர் புதன்கிழமை வாக்கெடுப்பை நடத்தினர், ஆனால் அது குடியரசுக் கட்சியினரால் தோற்கடிக்கப்பட்டது.